Luke 8

Amp Mat Ndi, Jisas Pep Rok Akil Tek Purung.

1Wote Jisas ni, kona peng na mbo kona mbila, Got nga wamp tᵾpa mumuk rui uⱡ ei nga Rᵾnang Ik Kai ei nga, wamp ik mbo indimp nimba purum. Elim nga kitip kᵾni wu 12 kᵾⱡ kunda ku, rup rok purung. 2Amp kat kunda ku, rup rok purung. Amp kᵾⱡ, unt kui pepa kur kit rukᵾr orunga murum ila, Jisas ndi, nimba tᵾpa mundrum. Amp ti nga mbi Mariya Makndelin. Amp nga, rukᵾr orunga kur kit 7 kᵾⱡ morung ila, Jisas ndi, nimba tᵾpa mundrum. 3Wote amp ti, Jowana, Susana na, amp mat kunda, rup rok purung. Wu Kusa ambᵾm Jowana, wu Kusa ni, ei wu nuim Erot nga manga rᵾp inditim. Amp kᵾⱡ ndi, Jisas na, kitip kᵾni wu kᵾⱡ, tᵾk rapᵾndᵾk, enim nga mel mbᵾ, wu kᵾⱡ ngᵾk etᵾng.

Wu Ti Ndi, Rᵾng Mong Mbo Mundrum Ei Nga Ik Ek

4Kona peng elpa elpa mbila wamp rᵾⱡaip mam ti ok, Jisas kᵾn mᵾk rok morung ila, Jisas ndi, wamp kᵾⱡ kᵾn, ik ek ti ropa, nimba mel, “Wu ti ndi, wit mong mat mepa mba, kongun kona mbila ropa mundrum ila, wit mong mat mba, nombuⱡa mam ila mana purum. Wote wamp mbᵾ ndi, andᵾk kambᵾlᵾngina, kᵾi mbᵾ ndi ok, tᵾk norung. 6Rᵾng mong mat mba, ku pol ila, mᵾi wei wei etpa tetᵾm mbila, mana purum ila, tᵾkrᵾpa mint oⱡa mba, wote kurum. Ei nambuⱡ emel, mᵾi ei kᵾp etᵾm. 7Wote, wit mong mat, goimbun rong pana mbila, mana purum mbᵾ, goimbun rong morum mbᵾ ndi, tᵾpa kom rorum ila, oⱡa ui nawᵾrᵾm. 8Wote, wit mong mat, mᵾi kai mbila, mana purum mbᵾ ndi, mᵾlᵾ ropa oⱡa omba, ropa kai mondpa, rᵾng mong mat, 100 nimba rurum,” nitim. Jisas ndi, ik ek ni, ropa pora ndupa kᵾn, wi ropa, wamp mbᵾ kundpa, nimba mel, “Wamp ti, kum nombuⱡa tem ndam, ik nᵾnt kᵾⱡ pilik itᵾi!” nitim.

Nambuⱡ Emel Jisas Ndi, Ik Ek Mint Rurum

9Jisas elim nga kitip kᵾni wu ni kᵾⱡ ndi, Jisas nga ik ek rurum puⱡ ei, nimba mot ngangga, nᵾk waldᵾtᵾng. 10Wote Jisas ndi, elim nga kitip kᵾni wu kᵾⱡ, kundpa nimba mel, “Got elim ndi, Got nga wamp tᵾpa mumuk rui uⱡ, mo ropa tetᵾm ei, enim tᵾpa, ora ndupa pora ndurum. Wote, wamp mat ndi, ik ek ila mint piling. Wote, mong ei ndi kᵾning ei wote, kandᵾk mbi ndui nᵾnding. Ik pᵾtmᵾn ei, wote ik puⱡ ei, pilik mbi ndui nᵾnding,” nitim.

Rᵾng Mong Kᵾⱡ Nga Ik Ek Puⱡ Ei

11Jisas ndi, ik ek ropa nitim kᵾⱡ nga puⱡ ei, para ndupa nimba mel, “Wit mong kat nᵾnt ni kᵾⱡ, Got nga ik mong ei, to rondᵾp nᵾnt. 12Wit mong mat, nombuⱡa mam ila mana purum ei, to rondpa wamp mat, unt Got nga ik mong ei, pilik moⱡina kᵾn, wote Seitan ndi, kandrᵾm mel, wamp kᵾⱡ, Got kᵾn mondᵾk piling enmin ei, ka nimba pilpa kᵾn, wote rᵾk omba ik mong pᵾtmᵾn kᵾⱡ, tᵾpa mepa purum. 13Wote, wit mong kat, ku pol ila mana purum ni, wamp mat, Got nga ik kai mbᵾ pilik, numan ngormin ni mel. Wote ik ei, numan ila puⱡ pilkan ngumba pi napᵾtᵾm, wote ui onunga ila mint pᵾtmᵾn. Wote, mbun mat orum ei kᵾn, mundmong etᵾk, Got wak rormin. 14Rᵾng mong mat, goimbun rong morum kona mbila mana purum. Uⱡ ei, to rondpa wamp mat, Got nga ik ei pilik kᵾn, wote kᵾng orunga uⱡ mbᵾ nga kel rondᵾk ku moni numan ngurmin. Uⱡ ei ndi, Got nga ik pᵾtmᵾn ei, en enim kᵾn, mong ropa, muⱡ pi napᵾtᵾm. 15Wote, wit mong mat, mᵾi kai mbila mana purum ei, wamp mat ndi, Got nga ik mong ei pilik tᵾk numan ila pendᵾk, numan kun kai mbᵾ pilik, ronduⱡ mundᵾk, uⱡ kai mbᵾ etᵾk, mong rok muⱡ petmin,” nitim.

Rᵾⱡang Ei Tᵾk Ming Ila Ʉk Rui Narᵾrmin

16Wote Jisas ndi, nimba mel, “Wamp nam ti ndi, lam kiya kandpa, nu ming ila ᵾk ropa, rat pol mana orunga ila, mundi namᵾndᵾrmin mon! Lam kiya kandᵾk, mondᵾrmin kona ila mondᵾⱡmina kᵾn, wamp murᵾk ormᵾn mbᵾ ndi, rᵾⱡang ei kandᵾk ormᵾn. 17Ni kᵾn, mel mat, akup mo ropa tetᵾm mbᵾ, wote pena ila ekit omba. Wote mel mat, panda ropa tetᵾm mbᵾ, wote rᵾⱡang ila ekit wangga, wamp mbᵾ ndi kᵾning. 18Enim wamp kum nombuⱡa tem ndam, ik nᵾnt kᵾⱡ, kum tek pilik kai itᵾi! Wamp nam ti, mel mat, tepa moⱡum ndam, Got ndi, mel mat, aldpa pol ila ngumba. Wote, wamp nam ti, mel mat, tepa muⱡi nambᵾⱡᵾm ndam, tep mor nimba pᵾtᵾm mel mbᵾ, Got ndi, rukᵾr tᵾmba,” nitim.

Jisas Nga Mamᵾl Na Ʉngᵾnᵾl Kᵾⱡ Namin

19Wote, Jisas elim nga mam kᵾn ᵾngᵾnᵾl na mbᵾ, Jisas kᵾning pilik orung. Wote, wamp mbᵾ ndi, Jisas tᵾk pok etᵾng ila, Jisas ruk ok, kᵾning mel kapⱡa mon itim. 20Ni kᵾn, wamp ti ndi, Jisas kundpa, nimba mel, “Manᵾm kᵾn, ᵾngᵾnᵾl na mbᵾ, nim kᵾnmin nᵾk, pena orunga ok mormin,” nitim. 21Wote Jisas ndi, ik nᵾtᵾng ni, punt ropa nimba mel, “Wamp mat, Got nga ik ei pilik, pep rok eng wamp mbᵾ, na nga mamᵾl na, ᵾngᵾnᵾl mbᵾ ka!” nitim.

Jisas Ndi Nilinga, Kᵾpkᵾ Mam Ei Kᵾr Nitim

22Ui ti kᵾn, Jisas elim nga kitip kᵾni wu ni kᵾⱡ kᵾn, nu kanu kat ila ok, oⱡa purung. Puk molk kᵾn, Jisas ndi, kitip kᵾni wu kᵾⱡ, kundpa nimba mel, “Tᵾn mbun num ei nga, noi ᵾldᵾ orunga pamin!” nitim. I nilinga, wote purung. 23Nu kanu ni kᵾⱡ, nu ndi, pol ila puⱡnga mel, Jisas ni, nu kanu nila rukᵾr ur pitim. Ni kᵾn, kona kᵾpkᵾ mam ti, roⱡnga mel, num ni, kildpa ropa, rukᵾr omba, nu kanu ni kᵾⱡ nu ndi, peka romba elinga, wu ni kᵾⱡ, nu wanging etᵾng. 24Wote, kitip kᵾni wu ni kᵾⱡ ndi puk, Jisas rok rut nduk, nᵾk mel, “Nuim ye! Nuim ye! Tᵾn nu wanggᵾpᵾn kᵾⱡmin enmin ei ka!” nᵾtᵾng. Ni kᵾn, Jisas rut nimba, kona kᵾpkᵾ kᵾn, nu kᵾn, tᵾpa pendpa ik nguⱡnga kᵾn, kona kᵾpkᵾ ni, kᵾr nilinga, nu ndi, rurum ni, tiyu nimba titim. 25Wote Jisas ndi, elim nga kitip kᵾni wu ni kᵾⱡ, waldpa nimba mel, “Enim nga mondpa pili uⱡ ei, nant?” nitim. Wote wu, ni kᵾⱡ, uⱡ ni kandᵾk, mundmong etᵾk, numan ou nduk pilik, nᵾk mel, “Wu ei namba wu ti nda? Wu ei ndi, kona kᵾpkᵾ kᵾn, nu ei kᵾn nilinga, wu ei nga ik ei, kum tekᵾⱡ, tᵾngᵾnda mint kur nᵾnmbil ei ka!” nᵾtᵾng.

Wu Ti Kur Kit Rukᵾr Orunga Murum Ni, Jisas Ndi, Makrᵾpa Mundrum

26Wote, Jisas kᵾn elim nga kitip kᵾni wu ni kᵾⱡ kᵾn, Gerasin wamp mbᵾ nga kona nila puk, rᵾk purung. Ni kᵾn, Gerasin ni kona ei, num Galili ᵾldᵾ orunga tetᵾm. 27Jisas ni, nu kanu purung ni kᵾⱡ, wak ropa ekit puⱡnga, kona peng ila, wu ti omba, Jisas kandpa titim. Wu ni nga rukᵾr orunga, kur kit mat morung. Wu ei, kump kor nga kur kit ndi, ropa wᵾlᵾ munduⱡnga, muⱡ rᵾⱡi naⱡᵾpa, manga tila mukᵾr pi nᵾpᵾtᵾm, mon! Wote, pena wamp on kona mbila pepa ᵾndrᵾm. 28Wote, wu ni ndi, Jisas kandpa, ronduⱡ ke nimba omba, Jisas nga kᵾmp puⱡ nila omba, mana pitim. Wote, ronduⱡ ke nimba mel, “Jisas, nim Got Oⱡa orunga nga kangᵾm ei, na kᵾn namba uⱡ ti, itᵾn on nda? Nim wu kai ei ndi, na etkᵾn kit mundi nᵾmᵾndi,” nitim. 29Ei nambuⱡ emel, Jisas ndi, wu ei, kur kit rukᵾr orunga murum ei, kundpa nimba mel, “Nim ndi, wu ei, wak rokᵾn kelkᵾn ekit pi!” nitim. I nilinga mel, kur kit ni, ronduⱡ ke nitim. Wamp mbᵾ ndi, wu ei nga kᵾmp ki mbᵾ, kan ronduⱡ mat ndi rok, gi nduk pendᵾtmᵾn mbᵾ, ropa puⱡa rorum. Kur kit ei ndi, wu ei, ropa wᵾlᵾ munduⱡnga, kona waka mbila, pena pepa ᵾndrᵾm. 30Wote Jisas ndi, kur kit murum wu ni, waldpa nimba mel, “Nim nga mbi nam?” Kur kit ni ndi, nimba mel, “Na nga mbi ou ndupa ei ka!” nitim. Nambuⱡ emel, kur kit ou ndupa, wu ei kᵾn, rukᵾr orunga morung ei nga nitim. 31Wote, kur kit nimbᵾ ndi, ronduⱡ ke nᵾk, Jisas waldᵾk nᵾk mel, “Nim ndi, tᵾn tᵾkᵾn ndip kona ila, mundi nᵾmᵾndi mon!” nᵾtᵾng.

32Ni kᵾn, komnga mong ramba tila, kng puⱡi, ᵾi ongum nok morung. Kur kit nimbᵾ ndi, Jisas kᵾn ronduⱡ ke nᵾk, waldᵾk nᵾk mel, “Nim ndi, tᵾn kundᵾk kui tana kᵾn, tᵾn ombᵾn kng kᵾⱡ ila, rᵾk pamin,” nᵾtᵾng. Wote Jisas ndi, kur kit ni kᵾⱡ tᵾpa, kng ni kᵾⱡ kᵾn tᵾpa, rukᵾr ndurum. 33Wote, kur kit nimbᵾ ndi, wu ni, wak rok ok, kng rᵾⱡaip mam ni kᵾⱡ kᵾn, rᵾk rᵾk etᵾng. Kng rᵾⱡaip mam nimbᵾ, ronduⱡ pᵾn nᵾk puk, kona kop tila mana puk, num tila nu wanggᵾk korung.

34Kng rᵾp etᵾng wu nimbᵾ ndi, uⱡ ni kandᵾk tᵾkrᵾk puk, kona peng na kona mbila pora, ik nᵾk mek int int purung. 35Wamp mbᵾ ndi, namba uⱡ ti, enim nda nᵾk, kᵾnmin nᵾk orung. Ok kandrᵾng mel, kur kit ndi, ropa wᵾlᵾ mundrum wu ni, numan mbo pilpa, muⱡ raⱡpa Jisas nga kᵾmp puⱡ nila nondpa murum ila, wamp kandᵾk mundmong etᵾng. 36Wote, wamp mbᵾ ndi, Jisas nga uⱡ itim ni, kandᵾk min ngᵾn mundᵾk, timan rok nᵾtᵾng. Wu ei, unt kur kit ndi, ropa wᵾlᵾ mundpa itim ni, akup numan mbo pilpa morum, nᵾtᵾng. 37Wote, Gerasin kona ila wu nimbᵾ ndi pora, Jisas nga uⱡ ronduⱡ itim ni kᵾⱡ, kandᵾk min ngᵾn mundrᵾng. Wote, Jisas waldᵾk nᵾk mel, “Jisas ndi, wamp kᵾⱡ, wak ropa kelpa pangga!” nᵾtᵾng. Wote Jisas ndi, kona ni, wak ropa, nu kanu kat ila, oⱡa mba kelpa purum. 38Ni kᵾn, kur kit ndi, ropa wᵾlᵾ mundrum wu ni ndi, Jisas ronduⱡ mundpa, waldpa nimba mel, “Nim ndi, kapⱡa nana, na nim kᵾn kunda pumbil,” nitim. Wote Jisas ndi, wu ni, yant ndupa nimba mel, “Nim int pukᵾn, Got ndi, nim tᵾpa rapundpa endim uⱡ mbᵾ mel, wamp mbᵾ, kundkᵾn nᵾn pi!” nitim. Wote wu ni, mang kona kelpa yant omba, kona peng na, kona mbila pora, wamp mbᵾ kandpa, Jisas ndi, elim tᵾpa rapundpa itim uⱡ mbᵾ mel, wamp mbᵾ kundpa nitim.

Jisas Ndi, Amp Ti Kᵾn Ambuⱡa Ti Kᵾn Etpa Titim

40Wote Jisas ni, num noi ᵾldᵾ orunga, rᵾk oⱡnga kᵾn, nokundᵾk morung wamp nimbᵾ ndi, ambulk palk, rawe etᵾk tᵾtᵾng. 41Ni kᵾn, wu ti mbi tek, Jairus nᵾtᵾng ei, kuimp tepa urum. Wu ni, atinga manga kel ila nga rup wu murum. Wu ni omba, Jisas nga kᵾmp puⱡ nila, mura ropa mondpa, Jisas kᵾn kont it ik ranggᵾpa, elim nga mang kona pambᵾⱡ nitim. 42Nambuⱡ emel, wu ni nga mbuⱡam ambuⱡa tenda ei, mint metᵾm. Ambuⱡa wendᵾp ei nga pana 12, ei nondpa koⱡmba itim. Wote Jisas ni, puⱡnga mel, purum nombuⱡa mam nila wamp minal ndi, Jisas tᵾk kum rok purung. 43Ni kᵾn, amp ti, kona nila murum. Amp ei, rᵾk rᵾk ku puk roⱡnga, pana 12 omba purum. Amp ei ndi, elim nga kui ei, etᵾp tᵾp mundimp nimba, ku moni ou ndupa wak rurum. Wote kui ei, pora ni nᵾndᵾtᵾm. 44Amp ni, Jisas purum mbuldung orunga nondpa mba, Jisas nga wal pᵾki pᵾkrᵾm ni kᵾⱡ, ki ei ndi, minda ndurum. Ni kᵾn, elim nga ku puk rurum uⱡ ni, tᵾngᵾnda mint pora nitim. 45Wote Jisas ndi, wamp mbᵾ, waldpa nimba mel, “Nam ndi, na minda ndunum?” nitim. Wote, wamp nimbᵾ pora, en enim mon nilingina, Pita ndi, Jisas kundpa, nimba mel, “Wu Nuim ye! Wamp puⱡi molk, nim tᵾk rᵾk ndunmin ei ka!” nitim. 46Wote Jisas ndi, wamp nimbᵾ, kundpa nimba mel, “Wamp ti ndi, na minda nduⱡnga kᵾn, na nga ronduⱡ ei, punum pᵾnt ei ka!” nitim. 47Ni kᵾn, amp ni, pitim mel, elim mo romba uⱡ ti, mon itim ila, min ngᵾn mundpa omba, Jisas nga kᵾmp puⱡ nila mura ropa mondpa mba, mana mᵾi ila rumᵾⱡi pitim. Wote, wamp morung kuimp keta nila, amp ni, elim nga numan pilpa itim uⱡ nimbᵾ, nimba mel, “Na nga kui ti, petᵾm ei, tᵾngᵾnda mint pora ninim,” nitim. 48Wote Jisas ndi, amp ni, kundpa nimba mel, “Ambuⱡa ye! Nim ndi, na kᵾn mondkᵾn pᵾn uⱡ ei ndi, nim nga kui ei pora ninim. Ei nga, nim numan wang ndukᵾn pi!” nitim.

49Wote Jisas ni, wamp ik mbo endpa moⱡnga kᵾn, atinga manga rᵾp wu, Jairus ni nga wu ti ndi omba, elim kundpa nimba mel, “Nim nga ambuⱡa ni, koⱡum ei nga, nim ndi, ik mbo wu ei, mbun ik ti, ni nᵾni mon,” nitim. 50Wote Jisas ndi, ik ni pilpa kᵾn, atinga manga rᵾp wu Jairus ni, kundpa nimba mel, “Nim mundmong iti nᵾti! Nim mondkᵾn pilkᵾn muⱡana kᵾn, ambuⱡa ei kapⱡa etmba,” nitim. 51Wote Jisas mba, atinga manga rᵾp wu ni nga manga ila purum. Ni kᵾn, Jisas ndi, wamp mbᵾ pora, pena muⱡeing nimba, Pita, Jon, Jeims na, ambuⱡa ei nga tipam mam raⱡ kᵾn mendpᵾⱡ, tᵾpa mepa mukᵾr purum. 52Wamp mat, ambuⱡa kurum on ni tek, ka etᵾk morung. Ni kᵾn, Jisas ndi, wamp ni kᵾⱡ, kundpa nimba mel, “Enim ka iti nᵾtᵾi! Ambuⱡa ei kuⱡi naⱡᵾm, wei ur petᵾm,” nitim. 53Ni kᵾn, ka etᵾk wamp morung nimbᵾ ndi, ambuⱡa ei, kurum pilik pora ndurᵾng. Ei nga, Jisas nga ik nitim kᵾⱡ pilik oi endᵾtᵾng. 54Wote Jisas ndi, ambuⱡa ni nga ki ni, ambuⱡpa oⱡa tᵾpa, nimba mel, “Ambuⱡa ye! Nim oⱡa muⱡi!” nitim. 55Ni kᵾn, ambuⱡa ei nga muⱡnga ei, yant omba rukᵾr puⱡnga, ambuⱡa ni, tᵾngᵾnda mint rut nimba, oⱡa murum. Wote Jisas ndi, wamp ni kᵾⱡ, kundpa nimba mel, “Ambuⱡa ei, rᵾng mat nangga, mek ok ngui!” nitim. 56Ambuⱡa ni nga tipam mam raⱡ ndi kandkᵾⱡ, min ngᵾn mundrᵾnggil. Wote Jisas ndi, wamp raⱡ, kundpa nimba mel, “Ya uⱡ kanmbil ei, wamp mat kundkᵾⱡ, ni nᵾnᵾl mon!” nitim.